Patay on the spot ang usa ka bata human nalatayan ug dumptruck pasado alas 8 ang takna kaganihang buntag kilid sa seawall sa Purok 5, Brgy 76 , Bucana, Davao City.
Giila ang biktima nga si Raphzel Artiaga, usa ka tuig ug tulo ka bulan , kamanghuran sa unom ka mga anak nila ni Roldan Artiaga, forklift operator ug Michelle Artiaga, housekeeper, taga Bunawan, Davao City.
Subay sa pakighinabi sa Brigada News Team ngadto sa inahan sa biktima, naa siya sulod sa tindahan sa iyang ate ug nalipat kini sa dihang naghinayhinay ug lakaw pagawas sa lataran ang iyang anak ug aksidenteng nalatayan sa nagpadulong nga HOWO SinoTruck Dumptruck (PN: NAV-7434), gimaneho ni Elpidio Romero Dumapay, 44 anyos, taga Purok 1 Sitio Kalamuhoy, Kapatagan, Digos City.
Ang patayng lawas sa biktima giatiman sa Angel Funeral Homes, Torres St., Davao City.
Nasayran nga nibisita lang ang ginikanan ug anak sa balay sa igsoon niini sa Bucana sa dihang nahitabo ang aksidente.