Wala ginadula ang anggulo nga “inside job” sang Hinobaan Municipal Police Station sa nagluntad nga pagpangwat sa Ilog Rural Bank Hinobaan branch nga nahamtang sa Prk. 1 Brgy. 1 sang amo nga banwa sa diin nagdangat sa P1.3Million nga nasulod sa vault ang nadula.
Suno sa kay Major Clifford Batadhay, hepe sang Hinobaan PNP, nga alas 7:30 sang aga Nobyembre 11 sang nagpadulong sa police station ang isa ka empleyado kag trainee sang Ilog Rural Bank nagapabalo nga bukas na ang ila nga roll-up door kag ginkawatan ang nahambitan nga bangko.
Dugang pa ni Batadhay nga sandig sa ila pagpangusisa, tigayon nga naka sulod ang suspitsado pinaagi sa pagbukas sang roll-up door kag nabuksan sini ang mga pirtahan pati na ang vault kag ang safety box nga ginasudlan sang kwarta.
Una nga gingabot sang suspitsado ang plug sang alarm system kag cctv cameras pinaagi sa pagbuklas sang isa sa mga bintana sa kilid sang bangko sa diin malapit ang outlet nga ginasaksakan.
Makatilingala man silin sang hepe bangud wala ginpwersa nga buksan ang roll-up doors pati na ang main door sang bangko kag ang grills sang vault.
Patimaan nga may liyabe ang kwatan sang mga lock kag nahibaluan man sini ang mga number combination sang vault kag sang safety box.
Nasugilanon man sang mga imbestigador ang officer in charge sang bangko kag suno diri, iya nga ginsulat sa logbook ang number combinations pati na kun pila ang unod sang vault, apang indi na subong makita ang logbook.
Gindeklarar man sini nga naglab-ot sa P1.3million ang ginkawat sa ila vault.
Posible nga sunado sang kawatan kun sa diin natago ang mga liyabe kag ang kwarta bangud wala sang may nagalinapta sa opisina sang bangko, kag ang tray lang gid nga ginsudlan sang kwarta ang nahulog gikan sa safety box, nga ginbilin man nga bukas sang suspek.
May nasugilanon man si Batadhay nga isa ka residente tupad sang bangko sa diin nahamtang ang bintana nga ginbaklas agud mapang gabot ang plug sang alarmsystem kag CCTV, nga wala gid nakataghul ang ila ido patimaan nga kilala sini ang suspitsado.
Posible nga sang Nobyembre 10 sang gab-i ukon kaagahon sang Nobyembre 11 nagsulod ang kawatan bangud malinong na sa sini nga mga inoras ang Hinobaan bangud sang curfew nga ginapatuman.
Ginpangkuhaan naman sang mga imbestigador sang affidavit ang 6 ka mga empleyado bilang kabahin sang ila imbestigasyon.
Naproseso naman sang Scene Of the Crime Operatives ang crimescene sa posibilidad nga makakuha sang mga forensic evidences.
Damlag pa nga ginpaandaman na ni Batadhay ang bangko sang sila ang nagpatigayon sang weekly security assesment bangud wala sila sang guwardiya nga nagaduty bisan sa kagab-ihon.