NAGSUGOD na ang pagpanghatag og relief package sa mga residente nga apektado sa pagbaha sa upat ka barangay sa Alabel, Sarangani Province asa 400 ka pamilya ang apektado.
Matud ni Mayor Vic Paul Salarda nga gideklara na ang state of calamity sa apektadong barangay sa Alabel nga mao ang Bagacay, Poblacion, Ladol ug Kawas.
Mga pananum ug pipila ka prawn farm ang nadaut sa pagbaha tungod sa sunod sunod nga pag-ulan ug segun sa inisyal nga report, anaa sa P5 million ang damyos.
Dugang pa ni Salarda nga nagpadayun usab ang dredging sa baradong creek ug pag-ayo sa naguba nga kadalanan.
Ang Cogonal creek matud pa nga walay exit ang hinungdan sa pagbaha sa national highway sa Alabel ug kasamtangan ginasabot ang landowner sa maong lugar aron makahatag og agianan sa tubig aron dili mobuhagay sa highway panahon adunay kusog nga pag-ulan.
Butyag usab ni Salarda, nagpadayun usab ang rehabilitasyon sa Kalminda watershed nga makatabang matud pa aron makapugong sa tubig nga mugna sa pag-ulan.