Uman nga ginpadumdom it Department of Health Western Visayas Center for Health Development (DOH WV CHD) ro panawagan kontra sa pagkonsumo it shellfish, kaangot sa panawagan it provincial government it Capiz kasunod it mga kaso it paralytic shellfish poisoning sa nasambit nga probinsya.
Ro warning hay base sa Shellfish Bulletin No. 20, series of 2023, nga gin isyu it Bureau of Fisheries and Aquatic Resources (BFAR) nga nagakumpirma nga positibo sa paralytic shellfish poison (PSP) o toxic red tide sa Sapian Bay nga nagasakop sa kaeawran it mga banwa it Ivisan ag Sapian sa Capiz ag Mambuquiao ag Camanci, Batan sa Aklan.
Matandaan nga naireport it Capiz Epidemiological Surveillance and Response Unit ro pagkamatay it sangka 9 nga dag on nga unga nga eaki halin sa Pilar, Capiz nga nagpakita it sintomas it diarrhea ag pagpaeanuka.
Kamana man ro 31 nga posibleng kaso it PSP nga nailista sa nasambit nga probinsya kung siin, 28 ro halin sa banwa it Pilar, 3 halin sa Pontevedra, ag sambilog ro halin sa Roxas City.
Samtang ro limang nabilin nga kaso halin sa probinsya it Iloilo; 4 kara ro halin sa Balasan ag sambilog ro halin sa Carles.
Sa pag imbestiga, ginhayag it DOH-6 nga kaabuan sa mga pasyente hay nakakaun it green shells bago ro pagguwa it mga sintomas.
Kan-o eang hay nagpaguwa man it advisory ro BFAR 6 nga hugot nga nagahambae sa publiko nga temporaryong punduhon ro pagkaun, pag ani, pagdaea ag pagbaligya it tanan nga klase it shellfish ag alamang halin sa nasambit nga lugar. // ANN DESLENE SALAZAR