Gilantaw pa karon kung malakip ba sa areas of concern sa May 9, 2022 National and Local Election ang Cagayan de Oro homan matala ang sunod-sunod nga kaso sa pagpamusil.
Gibutyag ni Commission on Election Northern Mindanao Regional Election Director Atty. Francisco Pobe nga ipa-ilawom pa sa evaluation sa Philippine National Police ang mga kaso sa pagpamusil ug sutaon kung ordinaryo ba kini nga krimen batok sa usa ka tawo, politically motivated o dunay koneksyon sa politika.
Hinuon gidugang ni Atty. Pobe nga sa karon nagpabilin nga generally peaceful ang tibuok rehiyon ug nanghinaot sila nga unta magpadayon kini hangtod mismo sa adlaw sa piliay.
Subay niini, dungan sa pagsugod sa local campaign period lauman nga manguna ang Comelec sa pag-establisar sa Regional Joint Control Security Center aron mahibal-an ang dagan sa politika sa rehiyon.