GINABAWAL na ang pagdala og armas bisan may saktong papelis ning pagsugod na sa election period tibuok nasud alayon sa umaabot nga National and Local Elections kung asa ginapatuman ang Comelec Resolution number 10728 sugod January 9 hangtud June 8, 2022.
Sa paghinabi sa 89.5 Brigada News FM Gensan kay City Comelec Officer Atty. Sittie Sharmaine Papandayan Garangan, gisulti niini nga ginabawal na ang pagdala og pag-transport og armas sa pampublikong lugar, mga parke, sa kalye, bisan kon may permit to carry luwas lang kon may Certificate of Authority gikan sa Commission on Election.
Gidugang ni Garangan nga bisan sa mga personahe gikan sa gobyerno ginabawalan sa pagdala og armas kon walay pagtugot sa Comelec, ang makasupak sa gun ban mahimo nga mabilango og dili molampas sa unom ka tuig, apan dili mu-ubos sa usa ka tuig, kon taga gobyerno, Disqualification to hold Public Office unya dili na makabotar ug may perpertual cancellation to secure Gun License kon Permit. I Ver Diazon