Nagpadayon ang hot pursuit operation sa mga pwersa sa kapolisan ug tropa sa Provincial Jail ngadto sa armadong grupo nga myembro sa usa ka kulto nga responsable sa pag-atake sa Provincial Jail sa Mati City sa miaging Sabado, August 14.
Base sa official report, bandang ala 2:40 sa hapon gisulong sa mga miyembro sa “Pinatikan Religious Group” ang Davao Oriental Provincial Rehabilitation and Reformatory Center aron i-ikyas ang lider niini nga si Cornelio Galon III, 43 anyos.
Matod pa ni Provincial Warden Apollo Conde, tungod dili basta-basta makasulod sa high-security facility, gi-atangan ug nangita og tiyempo ang mga miyembro sa grupo aron makasulod sa main entrance.
Nahimo pang maka sukol sa augmentation forces sa 2nd COY DOPMFC ug 66th IB sa Philippine Army hinungdan sa pagkapatay sa usa sa mga miyembro sa armadong grupo nga giila nga si Arnel Magduboya, taga Purok Tagaytay, Taguibo, Mati City. Aduna usab wala pa mailhing ihap sa mga samdan gikan usab sa maong grupo.
Walay natala nga casualty sa mga tropa sa gobyerno ug sa uban pang mga inmates, apan naka ikyas ang ilang lider nga si Galon kauban ang unom ka mga kaubanang preso nga gi-ila nga sila:
• Dominador Lintuan, 43 anyos – Violation of RA 9165
• Laudico Lintuan, 37 anyos – Violation of RA 9165
• Gil Suga-an, 35 anyos – Violation of RA 9165
• Arjowe Lintuan, 23 anyos – Violation of RA 9165
• Ranjay Baloro, 23 anyos – Murder and Attempted murder
• Ismadi Inabitan, 47 anyos – Homicide Violation of Sec 261
Samtang padayon ang manhunt operation pinaagi sa mga pwersa sa gobyerno, nanawagan ang kapulisan ug ang Provincial Jail sa kung kinsa man ang dunay impormasyon kung asa naga tago ang maong grupo nga mudangop dayon ngadto sa otoridad.
