NAKAHILAK sa kalipay ang usa ka doctor sa GenSan human nga opisyal nga gipahibalo sa tagdumala sa Stevie Awards for Women nga makadawat kini og pasidungog isip Hero of The Year gumikan sa iyang trabaho.
Sa paghinabi sa 89.5 Brigada News FM Gensan kay Assistant City Health Officer Dr. Lalaine Calonzo gikumperma niini nga nakuratan ug nakahilak siya sa kalipay sa dihang gipahibalo kanidtong Septembre 23 nga makadawat siya og pasidungog sa Stevie Awards for Women isip Hero of the Year.
Nasurprisa daw kini sa award kay nisalmot siya subay sa criteria human nga na-nominate unya nagpadala sa iyang mga hulagway sa iyang trabaho sa tuig 2020-2021 ug halos anaa sa Anti Covid Response ang iyang gitrabaho.
Wala daw siya nakatingog sa unang pagkahibalo sa award kay wala siya nagdahom kay kon dili siya makadaug pasabot aduna pay kinahanglan aron mapalambo pa ang iyang trabaho isip empleyado, isip doctor nga na- assign sa duha ka Rural Health Unit, sa karon ang iyang gihuna-huna siya lang daw ang nagsalmot sa Stevie Awards apan ang iyaha daw nga pasidungog iyahang ginabalik sa katawhan lakip sa media nga nagatabang sa ilang trabaho, ilabi na sa pagpahibalo sa mga impormasyon alang sa maayong panglawas.
Kahibaluan nga ang Stevie Awards usa ka organisasyon kon Premier Business Awards Program alang sa mga kababayen-an nga gimugna sa prestihiyosong International Business Awards ug American Business Awards. ( Ever Diazon)