Nataban gid sang wala makilala nga mga suspetsado ang isa ka unit sang I-phone sang 15-anyos nga dalagita matapos ginholdap sa Barangay Baybay, Roxas City.
Sandig sa Roxas Component City Police Station, ang wala na ginhingadlan nga biktima ang isa ka grade 9 student kag residente sang Barangay Punta Tabuc sining syudad.
Ginpahayag sang biktima, nga samtang nagalakat sila sang iya abyan sa baybay, may yara sang duha ka lalaki nga makaduluda ang panghulagon.
Dugang pa sini nga ginpalapitan sila sang mga suspek, gintutukan sang matalum nga hinganiban kag nagdeklarar sang holdap.
Nagbato pa ang dalagita sa mga suspek agud indi lang makuha ang ila kagamitan, apang ginsumbag ini kag nag-angkon sang pilas sa tiyan.
Bangud dire, nataban gid ang isa ka unit sang i-phone sang biktima nga nagabalor sang P40,000.
Sa karon, padayon ang imbestigasyon sang mga kapulisan sa nasambit nga insidente. | Judy Ann Juare