Ginpaabot ni Aklan governor-elect Jose Enrique Martin Miraflores nga tutukan it anang administrasyon ro sektor it agrikultura ag turismo it probinsiya.
Matandaan nga nanumpa sa pwesto si Miraflores sa Kalibo, Aklan ku June 27, 2022 sa atubang ni Senate Majority Leader Juan Miguel ‘Migz’ Zubiri, nga nakataeana man nga maging Senate President sa 19th Congress.
Base pa sa bag-ong gobernador, ilunsar na uman ro programang ‘Gobyerno sa Baryo” agud ihatod ro mas ginpanami nga serbisyo it gobyerno sa mga lokal nga komunidad, himuon nga moderno ro Aklan provincial hospital, i-upgrade ro mga serbisyo it mga district hospitals sa pila ka mga banwa sa Aklan, ag idevelop pa ro kultura, tradisyon, sining, ag musika it probinsiya.
Nagpromiso man raya nga magpatindog it industrial ag IT park, magtukod it youth center sa Kalibo, ag maghimo it mga tourism circuit kaibahan ro mga stakeholder para isulong ro mga alternatibo nga tourism sites sa Aklan./JIL B. LACSON