Gipusil patay sa usa ka panday ang barangay kagawad sa Brgy San Roque, Digos City.
Sa imbistigasyon, nisulay sa pag-uwang ang barangay kagawad samtang nag away ang magtiayon apan tungod lango sa makahubog nga bino, gipusil niini ang kagawad sa barangay gamit ang handgun.
Naila ang biktima nga si Rey Emecino Colita, 47 anyos, residente sa Purok-6, Barangay San Roque, Digos City.
Giila usab sa pulis ang suspek nga si Jayradee Busadre Frande, 35, karpentero, residente sa Relocation, Barangay Igpit, Digos City.
Nasayran nga anaa sa diskohan ang biktima tungod kapistahan sa maong barangay sa dihang nakadawat kinig report nga adunay magtiayon nga nag away pipila ka metros gikan sa iyang nahimutangan.
Kauban sa biktima ang kauban niining kagawad nga si Ronelo Awe ug giadtuan ang balay sa nag away nga magtiayon aron i-pacify apan kalit gipusil sa suspek ang biktima tumong sa iyang likod hinungdan sa iyang hinanaling kamatayon.
Sumala sa mga imbistigador, nibalibad ang asawa sa suspek nga mouli sa ilang balay tungod mas gipili niini nga magpabilin sa balay sa babayeng konsehal sa barangay tungod nanimaho na kining bino nga maoy nahimong pabilo sa ilang away.
Nakita sa crime scene ang usa ka fired cardtridge sa 45 caliber pistol ug mga bala.
Naglusad ang Digos Police Operatives ug pursuit operation aron madakpan ang suspek nga nikagiw human gipusil ang kagawad.