KALIBO, AKLAN—Ginpaidaeom sa Modified Enhanced Community Quarantine (MECQ) do bilog nga probinsya it Aklan umpisa August 1-15, 2021.
Raya hay sandig sa ginpaguwa nga Resolution No. 130-D it National Inter-Agency Task Force (IATF) nga pirmado ni Department of Health (DOH) Secretary Francisco Duque III ag gin-aprubahan ni Pangueong Rodrigo Duterte.
Kung madumduman, nauna eon nga nagsueat si Aklan Governor Florencio Miraflores sa Regional Inter-Agency Task Force (RIATF) nga nagahinyo nga ipasaka sa mas mataas nga quarantine status do Aklan bangud sa padayon nga paglobo it kaso it COVID-19 infections ag agud nga mapunggan do pagkalhit it nagkasari-sari nga variants.
Nasayuran nga base sa datos it Provincial Health Office (PHO) Aklan, do COVID-19 cases sa probinsya hay owa naganaba sa 140 kada adlaw ag ap-at hasta it limang pasyente do nagakamatay kada adlaw sa ospital. // SHERRY ANNE REUNIR-VIDAL