NAPILDI gayod si Reymart Gaballo ug nigawas ang pagkabeterano ni Nonito Donaire sa away nga gihimo kagahapong adlawa sa Amerika.
Sa panglantaw ni GenSan coach Titing Laurente napildi gayod si Gaballo kay Donaire pinaagi sa wala nga sumbag nga nakaigo sa bodega nga hinungdan sa pagluhod ni Gaballo sa ikaupat nga round, nisulay sa pagtindog apan dili na makaya.
Naunhan si Gaballo sa mga kusog nga atake ni Donaire ug wala na makaya nga makapadayon away, apan maayo daw kini nga leksyon ni Gaballo gikan sa beteranong boksidor kung unsaon sa paggamit ang timing samtang nagahimo og adjustment ibabaw sa ring samtang nagadugay ang away.
Gidugang ni Laurente nga dili gihapon makumpyansahan ni Donaire anaa gihapon ang kusog ug ang kapaspas, paborito daw ni Donaire nga mo- atake basta nagaduol na ang kalaban sa pagdasdas kay magduol ang distansya ug mapaigo ang mga paborito niini nga sumbag gikan sa wala nga kinumo.
Nakita daw ni Donaire ang porma ni Gaballo nga may gamay nga abli sa depensa mao nga napasulod ang sumbag niini sa bodega nga una na niini nga naigo sa naunang round, apan bisan pa man sa resulta sa away mapasigarbuhon gihapon kita kay managsama lang nga mga Pinoy ang duha ka boksidor. I Ver Diazon