BICOL – LIWAT na tinawan duon kan Department of Health Bicol Center for Health Development o DOH CHD-Bicol an importansya kan pagsunod sa pagbabakuna kontra covid-19 base sa priority list na ipiglatag kan gobyerno.
Segun sa ahensya, ngunyan na nagpapadagos an pag abot kan mga bakuna sa nacion, dapat siertuhon na maeenot na matawan kaini nin mga prayoridad siring kan mga health workers, senior citizens asin mga indibidwal na igwang kamatean o helang.
Kun soboot nabakunahan na an mga kabale sa A1, importanteng maisunod an nasa A2 asin A3 tanganing maibitaran an malalang helang asin pagkagadan kan mga kabale sa inaapod na “vulnerable population”.
Tinawan linaw kan DOH Bicol na kahit bakunahan an mga kabale sa A4 asin A5, dai mababawasan an mga malalang kaso nin helang o fatalities kun dai mabakunahan an mga kabale sa priority groups A2 asin A3.
Katakod pa kaini pig inggnyar an mga kabale sa A4 asin iba pang kategorya na tawan dalan nguna an mga seniors asin may mga helang.
Nangapudan man an ahensya sa publiko na ingganyaron an mga kapamilya sa kategoryang ini na magparehistro asin magpabakuna bilang saindang dugang na proteksyon.
Pwediser na bakunahan anan mga tawong igwang iba pang helang kun sinda an igwang kontroladong kamatean.
An mga tawong may kontroladong kamatean iyo an mga tawong sa presente mayong sintomas , may stable na vital signs, mayong atake nin kamatean, dai kinakaipuhan na ma-admit sa ospital o magribay nin bulong sa huring tolong bulan asin presenteng dai naka-admit sa ospital.