Ginaeauman nga magatag-ud ro oras it pagbiyahe halin sa Iloilo paagto sa isla it Boracay kung nakumpleto eon ro Lambunao, Iloilo to Valderrama, Antique road, nga ginatawag nga Panay East-West Lateral Road Project.
Sa presente, ro biyahe paagto sa Caticlan, Malay, Aklan, paagto it Boracay, hay inaabot it haeos 5 oras, pero kung makumpleto ro nasambit nga proyekto, ginaeauman nga mapatag-ud raya it 2 oras.
Ro konstruksyon it 41-kilometer Lambunao-Valderrama road hay gin umpisahan ku 2017, nga ginpamunuan ni dating Iloilo 3rd District congressman ag makarun hay Governor Arthur Defensor Jr., nga nakabuoe it pondo para sa proyekto.
Maliban sa pagpatag-ud it travel time, tinutuyo it Panay East-West Lateral Road nga pabaskugon ro turismo ag agrikultura sa rehiyon.
Ginaeauman nga matapos ro nasambit nga proyekto sa dag on 2026. // ANN DESLENE SALAZAR