Gihangyo ni Konsehal Edgar Cabanlas ang hingtungdan ahensya sa Department of Public Works and Highways lakip na usab ang City Engineering Office nga mabutangan ug “cat’s eye” o road stud ang center lane sa mga internal highways sa syudad sa Cagayan de Oro.
Kini ang gipadangat nga special report ni Konsehal Cabanlas atol sa regular session sa 20th City council.
Kini human na obserbahan ni Cabanlas ang sunod-sunod nga mga vehicular accidents sa mga highways partikularmente sa portion sa CM Recto Avenue sa may Bugo lakip na usab sa Upper Puerto ug sa portion sa may Mastersns Avenue ning syudad.
Matud sa konsehal nga sagad gakahitabo ang aksidente panahon sa gabie ilabipa kung dili maayo ang panahon ug nabantayan niini nga dili na makita ang yellow lane sa tunga tungod napanas na ug tungod sab sa kangitngit sa dalan.
Nasayran nga ang ‘cat’s eye’ o ang mga road stud, mao ang gagmay nga mga marka nga makit-an sa mga dalan ilabina sa highway. Mahimo kini nga reflective, non-reflective o bisan solar powered, usa ka butang nga gamiton sa pagmarka sa utlanan sa usa ka dalan ug sa mga agianan niini nga mas klaro, ilabi na sa kangitngit.
Samtang lakip sa gisugyot sa konseho ang pagbutang ug mga solar street lights sa mga highways, gawas nga makaminus ang syudad sa bayrunon mas hayag pa kini itandi sa kasamtangan gigamit nga LED lights, nga gani ang uban sab poste wala pa gyud gasiga.
Tungod niini ang konseho nanghinaot nga tubagon sa DPWH ang hangyo nga mabutangan ug mga cat’s eyes ang mga secondary highway sa syudad alang sa dugang seguridad sa mga motorista.
Samtang ang taho girefer sa Komite Public Works and Infrastructures ubos ni Konsehal John Micheal Seno alang sa dugang pagtuon. -END-