Magsilbi nga leksyon o pasidaan sa ubang undocumented foreigners o mga langyaw nga ilegal ang pagpuyo dinhe sa nasod ang nahitabo nga pagdakop sa 3 ka Chinese national dinhe sa syudad sa Cagayan de Oro.
Sumala ni Bureau of Immigration-Northern Mindanao Regional Intelligence Operation Unit Head Ansari Maca-ayan nga unta tahuron sa mga langyaw ang balaod sa Pilipinas pinaagi sa pagp-comply sa mga rekisitos.
Kahibaloan nga ang 3 ka mga Chinese national nga gidakop dunay kalapasan sa balaod, sama na lamang sa pag-overstay, ug paglambigit sa trabaho nga walay tukmang permit.
Migawas sab sa sumbong nga ang subject sa mission order nga si Qiu Liao, dunay pending nga criminal case sa ilang nasod.
Una niini, nahimong init nga hisgutanan ang gihimong operasyon sa immigration batok sa mga intsik homan kini nagbaton sa mis-communication tungod sa gipagawas nga impormasyon sa Bureau of Immigration District Office-Cagayan de Oro ngadto sa kapolisan nga wala’y koordinasyon nga naka-abot sa ilang buhatan kalabot sa gipatuman nga mission order nga nadawat mismo ni Maca-ayan.
Tungod niini, gihatagan sa katin-awan ni Maca-ayan ang maong isyu, diin gipasabot niini nga gisunod nila ang tanang proseso sa pagsikop sa mga nahisgutang langyaw.
Sa karon, detinado na ang 3 ka Chinese National didto sa kauluhan ug ang legal division sa immigration nag-isyu na og commitment order, diin ipaubos sa deportation proceeding ang mga nahisgutang intsik. -END-