WALA ni-irog ang presyo sa Karne sa merkado publiko sukad nipatong na sa P300 pesos ang kilo sa liempo sugod bulan sa Nobyembre tuig 2021.
Sa price list sa General Santos City Meat Vendors Multipurpose Cooperative ang liempo sa karneng baboy anaa gihapon sa P300 pesos ang kilo, ang unod P285 pesos, ang ribs ug maskara sa P250 pesos, special bones- P200 pesos, atay P150 pesos, laman loob-P110 pesos, sari sa P120 pesos ug impelya-P130 pesos matag kilo.
Sa paghinabi sa 89.5 Brigada News FM kay Meat Vendors Coop President Toto Mosqueda gikumperma niini nga walay pag-irog sa presyo sukad sa miaging pagsaka sa presyo.
Ang rason daw nila nganong wala sila nagpasaka sa presyo gumikan wala man usab nitaas ang presyo sa farm gate price nga anaa sa P165 hangtud P170 pesos matag kilo samtang sa backyard piggery anaa sa P150-160 pesos matag kilo.
Gidugang ni Mosqueda nga pasalamat sila sa gihimo sa labaw sa City Veterinary Office nga si Dr. Antonio Marin sa pagpahigayon og dayalogo tali sa taga Socospa ug sa ilang bahin sa opisina sa City Economic Management ang Development Office kon CEMCDO kay napaminawan ang ilang mga mulo. l Ver Diazon