LEGAZPI CITY – Dakol nang mga lakdang an pinagsasagibo asin pigpeprepararan kan Philippine National Police (PNP) Bicol na parte kan saindang heightened security para sa Ligtas Paskuhan 2023.
Pigsyerto kan opisina, mas dodoblehon ninda an saindang pag-inguwa siring sa pagdeploy nin dakol na mga personahes sa manlain-laing mga lugar sa rehiyon nganing maasigurar an kaligtasan asin seguridad kan publiko ngunyan na Pasko asin Bagong Taon.
Kasarabay su boot sa saindang mga deployment strategy an community firecracker zones, assistance hubs, mga simbahan, commercial centers, road safety points, mga pantalan asin mga eropuerto.
Madugang man su boot ki mga personahes para sa mga operasyon kontra kriminalidad.
Mas papakusugon man su boot an police visibility asin patrol operations nganing masiyerto an seguridad kan kagabsan orog na sa mga maaratendir kan Simbang Gabi puon saaga.