MATRAYUMPONG naisagibo kan nakalihis na semana an virtual graduation kan kwarenta y otsong mentees gikan sa man iba ibang parte kan rehiyon na matrayumpong nakapagtapos kan Kapatid Mentor ME and Money Market Encounter o KMME-MME online program kan DTI.
An nasabing mga mentee-graduates na naggikan sa man iba ibang business sector an ikaduwang batch na matrayumpong natapos an mga modules kan nasabing online program sa laog nin nagkapirang bulan.
Sa saiyang mensahe sa mismong aldaw kan virtual ceremony, sinabi ni DTI-Bicol Regional Director Rodrigo Aguilar na sa irarom kan KMME-MME program nakatuwang ninda an mga successful business owners sa pagtutukdo asin pagtataong giya sa nasabing mga MSMEs.
Sa paagi soboot kan mentor me program, obheto kan ahensya na maibosol an konsepto nin ‘inclusive growth’ kun saen an pag uswag kan sarong sadit na negosyo an makakatabang bako sana sa mga obrero asin saindang mga pamilya siring man sa mga suppliers asin bilog na komunidad.
Kasabay kaini pigcierto man kan opisyal sa mga mentee-graduates na padagos na malalaoman an suporta kan DTI asin inabisuhan an mga ining padagos na aprubitsaran an mga pig oofresir nindang tabang para sa pareho nindang mga MSMEs.
Mantang sa parehong seremonya tinawan nin special awards an anom na partisipante na nagpahiling nin maray na performance mantang binisto man an Top 3 Regional Achievers kan 2nd batch kan sinambit na online course kun saen an nakakua nin ikatulo asin ikaladuwang puwesto an kapwa naggikan sa Camarines Norte mantang pignumbraran man bilang Top 1 an CPA-business owner na gikan sa islang probinsya kan Masbate.