NAHIMONG malampuson ang gipahigayon nga Jobs Fair sa Department of Labor and Employment kun DOLE sa usa sa mga mall sa dakbayan dungan sa kasaulogan sa 88th founding anniversary sa maong ahensya.
Kini ang gikumpirma ni Conrad Artates, ang labaw sa DOLE Gensan Field Office pagkahuman nga dunay 43 ka mga kompanya ug establishemento ang mipartisipar sa maong aktibidad gikan sa local ug overseas employment.
Sa maong kalihokan dunay unom nga hired on the spot o nakaangkon dayon og trabaho maong gipasalamatan sa opisyal ang anaa sa pribadong sector ug ilang counterpart sa nagkadaiyang ahensya nga miapil sa maong aktibidad.
Hinuon dili pa niini matino sa opisyal og pila ang kinatibuk-an nga nangita og trabaho niadtong panahona tungod kay ginahulat pa niini ang terminal report gikan sa ubos aron masuta ang gidaghanon sa mga tawo nga gusting makakita og trabaho.
Nasayran nga ang maong face to face nga jobs fair ang pinakaunang nahimo sa DOLE pagkalabay sa 21 ka bulan pagkahuman nga nakasinati og pandemya ang tibuok kalibutan tungod sa COVID-19. l Danny Casi