LEGAZPI CITY – Tinawan-duon kan Albay Provincial Health Office (PHO) an importansya kan enhanced newborn screening sa mga umboy.
Sa intrevista kan Brigada News FM Legazpi kay Safe Motherhood Program Coordinator Ma. Julien Garcia kan PHO, sinabi niya na kinaipuhan isairarom sa nasambit na screening an mga umboy na kakapangaki pa sana huli ta digdi maaaraman kun an aki igwa nin congenital metabolic disorders na posibleng magkawsa nin mental retardation na pwedesir magresulta sa malalang kaso asin kagadanan.
Segun saiya, normal an istura kan mga aki na igwa nin congenital metabolic disorder alagad made-detect sana kun igwa ini nin nasambit na helang sa paagi kan nasambit na screening.
Kun dai masairarom sa screening asin dai maagapan an nasambit na helang, pwedesir ining maging lifetime na kondisyon asin mas mapapahaloy an pagmamanehar sainda na pwedesir magresulta sa irreversible na mga kondisyon.
Kaipuhan na 24 oras makalihis sindang ipangaki, dapat tulos na sindang maisairarom sa newborn screening nganing kun mahiling na may problema, matawan tulos nin atensyon.