NAGSUGOD na ang bag-ong curfew sa GenSan nga alas 10 sa gabii hangtud alas 4 sa buntag subay sa gipagawas nga Executive Order number 22 ni Mayor Ronnel Rivera.
Gisugdan na usab kagabi ang liquor ban nga mulungtad sa Mayo 31.
Tumong sa bag-ong E. O nga maputol ang pagkatag sa COVID-19 sa GenSan, hinungdan takda usab magpahigayon og ‘random testing’ sa 10 ka barangay nga nag-una nga may taas ang kaso sa virus.
Apil sa E.O ang no Sunday movement nga magsugod tungang gabii sa, Mayo 16, Mayo 23 ug Mayo 30.
Samtang ang tanang taga gawas sa GenSan gidid-ang makasulod matag Dominggo gawas sa COVID 19 front-liners, hospitals and pharmacy staffs, mga miyembro sa PNP, JTF-GenSan, miyembro sa media ug ubang essential workers ug deliveries sa pagkaon ug essential public utilities.
Sa section 9 sa E.O ipatuman ang gitawag nga ‘boxing in’ strategies aron matabangan nga maputol ang chain of infection nga resulta sa local transmission sa mga households, purok, barangay, mga opisina, kompanya ug business establishments ug ubang areas o aktibidad nga angayang mapatuman.