HAPSAY ang peace and order sa Central Mindanao sa kinatibuk-an bisan sa nahitabong bus bombing incident sa Tacurong City, Nobyembre 6.
Kini ang gibutyag ni Major Gen. Roy M. Galido, commander sa 6th Infantry Division, Philippine Army ug labaw sa Joint Task Force Central nga sa karon padayun ang paggukod nila sa mga nakalapas sa balaod sa tabang sa kapulisan.
Wala pay grupo nga matudlo nga responsable sa maong krimen, apan wala gipapha ang posibilidad nga nalambigit ang mga lawless elements.
Sa karon may lead na ang kasundalohan kinsa mihimo sa pagpamomba apan makig-alayun pa sila sa PNP aron makonekta ang tanang impormasyon ug makahimo og operasyon.
Gidugang pa ni Galido nga sama sa nahitabong bus bombing gihapon sa Koronadal City miaging mga duha ka bulan asa YBL gihapon ang nalambigit, nailhan na ang responsable ug may nadakpan sila nga miyembro sa maong grupo.
Hangyo na lamang sa opisyal sa publiko nga muhimo sa ilang parte sa pagsiguro sa kahapsay ug kalinaw sa lugar.