DAKPAN sa buybust operation sa kapulisan ang duha ka trabahante sa construction sa UST Gensan Campus Hulyo 29 sa kaadlawon.
Sumala sa labaw sa Lagao PNP nga si PM Yol Hilado ang unang nadakpan sa buy bust ala una sa kaadlawon mao si Kent Nobleza alias Kenken, 25- anyos, ulitawo, timekeeper sa construction sa University of Santo Tomas Gensan Campus, transient sa Purok 2, Barangay Ligaya ug lumad nga taga Hacienda Alicia, Isabela, Negros Occidental.
Nakuha sa pulis ang usa ka putos sa gidudahang shabu nga may kabug- aton nga 0.0765 Grams ug ang P500pesos nga buy bust money, gihimo ang operasyon sa Purok 15, Lagao- Digos Makar Road National Highway.
Samtang pagka-alas tres sa kaadlawon laing buy bust operation ang gihimo sa kapulisan alayon sa Philippine Drug Enforcement Agency 12 sa Purok 19, Lagao, National Highway.
Ang gidakop mao si Nievien Mondia alias Totong, 40-anyos, ulitawo, supervisor sa laing construction sa UST nga taga Hacienda Concordia, Isabela, Negros Occidental.
Nakapalit ang poseur buyer og usa ka putos sa gidudahang shabu sa kantidad P500 pesos ug nakuha ang usa ka panit nga pitaka ng may sulod 13 ka putos sa gidudahang shabu.
Gipangunahan ni PLt Wenceslao Emperial ang operasyon ilawom sa kamandoan ni PM Yol Hilado, ang duha ka dinakpan gidala sa Dr. Jorge P. Royeca Hospital aron mahiling ug aron masunod ang health protocol bag-o itipon sa ubang priso samtang gi-andam ang tukmang kaso. ( Ever Diazon)