Inihayag ng Food and Drug Administration (FDA) na nais ng manufacturer ng Sputnik V COVID-19 vaccine na Gamaleya Institute ng bansang Russia na amiyendahan ang kanilang emergency use authorization (EUA).
Ayon kay FDA Director General Eric Domingo, pormal nang sumulat sa kanila ang Gamaleya para hilinging amiyendahan ang nasabing EUA.
Ang hiling na pag-amyenda ay mag kaugnayan sa interval ng pagitan ng dalawang doses ng nasabing covid-19 vaccine.
Ibig sabihin, maaaring pahabain o paikliin ang interval ng pagbibigay ng ikalawang dose ng bakuna matapos na mabigyan ng first dose.
Ayon sa FDA, naghihintay sila ng scientific data kung pwede bang baguhin ang interval ng pagbibigay ng Sputnik V.
Mababatid na noong Marso ngayong taon ipinagkaloob ng FDA ang EUA sa Sputnik V, kung saan ang interval sa pagitan ng una at pangalawang dose ay 21 araw o tatlong linggo.
Samantala, inanunsyo rin ng FDA na ang Bharat Biotech ng India ay nakapagsumite na ng kinakailangang dokumento, kabilang ang certification for good manufacturing practice para sa kanilang EUA application.