KALIBO, AKLAN—Nabutang sa pang waeong puwesto do isla it Boracay sa dag-unang Conde Nast (CNT) readers’ choice award para sa mga nagapangunang isla nga dapat bisitahan makarung 2021.
Maghalin sa 85 destinasyon, do surfing haven nga Siargao Island do ginrekognisa bilang top favorite sa isla samtang do sikat nga Palawan hay nabuoe do ikatatlong pwesto.
Do nasambit nga tatlong isla sa Pilipinas hay napierdi do iba pang world facvorites sa Asya kapareho it Raja Ampat Islands sa Indonesia’s (second), Phi Phi Islands sa Thailand (ninth), ag Phuket (10th).
Kaangot kara, ginkalipay man ni Tourism Secretary Bernadette Romulo-Puyat do nasambit nga balita bangud sa raya sigon nga tiempo do tanan hay nagatinguha agud nga makabangon do industriya it turismo ag do nasambit nga recognition hay nagasinanto man sa pinaka-latest nga global campaign it DOT nga “More Fun Awaits” nga nagapakita sa preparasyon it Pilipinas para sa international leisure travel s aoras nga do pandemic restriction hay pagaduea-on eon,
Samtang, do Pilipinas hay nabuoe man do ika-20 sa listahan it CNT sa mga Top Countries sa bilog nga kalibutan nga may score nga 91.63.
Nasayuran nga do dag-unan nga CNT Readers’ Choice Awards hay nagapamueo it mga feedbacks maghalin sa masobra 800,000 readers sa bilog nga kalibutan base sa andang pinakaulihing travel experiences sa mga nagapangunang hotels, resorts, cities, countries, islands, spas, trains, car rentals, luggage, airlines, airports, ag cruises. // SHERRY ANNE REUNIR-VIDAL