BICOL – MAABOT na sa kabilugan na kwatro sientos sitenta y cuatrong mga returning Overseas Filipino Workers sa rehiyon an naresibe na an saindang asistensya sa irarom kan programa kan Overseas Workers Welfare Administration OWWA-Bicol sa enot asin ikaduwang quarter kan taon.
Segun sa OWWA-Bicol, puon Enero Uno hasta Hunyo trenta ngunyan na taon, pigkakarkolong nasa lampas 7 million pesos na kantidad nin livelihood grants an saindang naipanao sa mga benepisyaryo kan Balik Pinas, Balik Hanapbuhay (BPBH) Program sa rehiyon.
Sa lindong kan nasabing programa, maresibe an kwalipikadong benepisyaryo nin programa nin tabang -pinansyal nin hasta bente mil na pwediser na magamit bilang puhunan sa negosyo o dagdag-kapital.
An nasabing programa an inisyatibo kan OWWA na attached agency kan DOLE sa obhetong matabangan an mga distressed, repatriated o napauling OFWs.
Bukas an nasabing programa para sa mga aktibo asin bako aktibong miyembro kan OWWA napundo o nawaran trabaho dahil sa kariribukan , politika, pandemya asin iba pa; naging biktima nin illegal recruitment, human trafficking, OWWA-members sa sapiritan na napundo an pagtratrabaho dahil sa problemang pinansiyal kan kumpanyang pinagtratrabahuan; sobra-sobrang pagtatrabaho na nagresulta sa pagkakahelang asin iba pang kadahilanan.
Pig aabisuhan man an iba pa na interesadong mag apply sa programa nna magpasiring sa pinakaharaning OWWA office dara an mga kinakaipuhan na mga dokumento tanganing tulos na maisairarom sa assessment asin evaluation.