GIREKLAMO sa mga residente ang agianan sa Pioneer Avenue atbang sa BDO sakop sa Brgy Dadiangas South, tungod sa lalom nga manhole nga walay tabon ug daghan na ang nabulasot.
Sumala ni Nene dili niini tinood nga pangalan, mokabat na sa 6 ka tawo ang nabulasot sa maong bangag ug anaa pay hapit mahulog sa ilalom niini. Dugay na syang nagtinda sa lugar ug kanunay niyang masaksihan ang pagkabulasot sa mga moagi kong dili makabantay.
Naghangyo na usab sila sa mga tiglimpyo sa nasangpit nga lugar nga ayuhon ug tabunan ang maong manhole aron wala nay madigrasya, apan hantod karon wala kini maaksyoni.
Delikado matud pa kini alang sa mga bata ug tigulang nga moagi kay kong dili makabantay mamahimong mahulog sa ilalom ug posibleng mamatay tungod agianan na kini sa tubig.
Samtang sa bahin usab ni Kapitan Rock Garay, wala pay naabot kaniya nga reklamo kabahin niini apan dihang iyang nahibaloan pinaagi sa Brigada News FM nga daghan na ang nadisgrasya sa lugar, iyaha matud pa kini nga ipaabot ngadto sa City Engineering Office aron tabunan ang maong bangag.
Nanghinaot pud ang mga vendor ug residente sa lugar nga mahatagan na kini og aksyon aron dili na musangpot pa sa higayon nga mas daghan ang madisgrasya. I Enamie Mogpon
Photo for illustration purpose only