Ipatuman na usab sa lokal nga panggamhanan sa Island Garden City of Samal (Igacos) ang kapin usa ka semana nga pagsirado sa tanang sementeryo, columbarium ug memorial park sugod October 28 hangtud November 3 dungan sa pag-obserba sa Undas.
Subay sa Executive Order Number 320 nga gipagawas sa IGACOS LGU, tumong niini aron malikayan ang panagtapok atol unya sa pagbisita sa katawhan sa ilang mitaliwang mahal sa kinabuhi.
Hugot usab gibawal ang pagpamaligya sulod sa mga sementeryo kung diin duna usab ipang deploy nga security personnel aron masiguro nga masunod ang kamanduan.
Hinoon giklaro sa EO nga tugutan ang burial services nga matunong sa maong mga petsa apan limitado lamang sa mga myembro sa pamilya.
Tungod niini giawhag ang mga residente sa maong isla nga duawon na og sayo ang lubnganan sa ilang mga kabanay ayha ang pagsugod sa pagpatuman niini.
