NAHIMO na karong consultant ni mayor-elect Lorelie Pacquiao si outgoing Kagawad Franklin Gacal Jr.
Kini ang gikumpirma mismo ni Gacal human sa pagdaog sa eleksyon ni Lorelie samtang gibutyag usab niini nga si Senador Manny Pacquiao magsilbi nilang adviser ug maoy mahimo nilang tulay sa pagpangayo og pondo alang sa mga proyekto sa GenSan.
Samtang dugang ni Gacal nga pinakauna nilang buhaton mao ang ilang posisyon sa partidong PCM sa Sangguniang Panlungsod, tungod kulang sila sa ihap.
Sa ilang grupo, tulo lang ang PCM nga konsehal ug kinahanglan matud pa nila og minimum nga walo aron makasiguro nga mapasa ang mga mahinungdanong resolusyon o ordinansa labi na sa budget.
Tumong nila nga makig-alyansa lakip ang pagkuha sa suporta sa ex officio member sa konseho sama sa SK chairman, ABC president ug IPMR representative.
Hinuon nagtuo gihapon si Gacal nga bisan unsa ang partido sa mga konsehal basta sa kaayohan sa katawhan makuha gihapon ang suporta.
Samtang sa kapalaran sa mga kontrobersyal nga department heads nga regular sa posisyon sa LGU- GenSan, ilaha matud pa kining tukion pa samtang sa bahin ni Celso Mendoza, nga anaa gihapon sa OSCA, kini ang angayan na matud pa manamilit.
Sa karon, aduna nay ginatun-an nga mahimong Executive Assistant, City Legal, Chief of Staff ug uban pa sa musuloray nga Pacquiao administration.