MOBALIK na ang iladong Sarangani Bay (SarBay) festival human sa duha katuig nga pagkalangan tungod sa COVID-19 pandemic.
Matud ni April Marjorie Rudes, Sarangani tourism officer, magsugod ang festival sa May 27 hangtud na sa 29 ning tuiga.
Highlight sa festival karong tuiga ang labing una nga Crown-of-Thorns Collection hinungdan sa panawagan nila sa tanang volunteer divers nga mahimong kabahin sa SarBay.
Ang pagbalik sa SarBay mao ang paghatag usab og pasalamat sa mga taga Sarangani ‘resiliency’ ug economic recovery sa probinsiya.
Giklaro ni Rudes nga bisan paman nailado ang SarBay festival nga labing dako nga ‘summer’ beach party sa Mindanao malahi ang selebrasyon karong tuiga, asa nakatutok sila sa pag-atiman sa kinaiyahan.
Gilikayan usa sa probinsiya ang ‘party’ tungod sa padayong bahad sa Covid-19 asa ang probinsiya ang pabiling ilawom sa alert level 2.
Tema karong tuiga mao ang “Wake Up SarBay”, kini ang pagbangon sa festival human ang duha katuig nga pagkatulog tungod sa pandemya. Takdang ianunsiyo sa probinsiya ang uban pang aktibidad nga dunay kalabutan sa kinaiyahan.
Samtang naa sa P1.495 milyon ang budget sa events and promotion sa festival karong tuiga. Naila isip ‘ultimate’ summer beach party scene sa Mindanao ang SarBay fest tungod sa pag-atrak niini sa libong mga bisita. Asa nasinati nila ang night-long music sa popular nga mga banda ug water sports-related activities. I Richel Gubalani