KALIBO, AKLAN—Hugot nga ginabawae do pagpaligos ag pagpatigayon it mga pagtililipon ag iba pang aktibidad sa mga baybayon, suba ag mangin sa mga swimming pools sa mga hotels ag resorts nga sakop it banwang Kalibo sa kapistahan ni San Juan Bautista sa Hunyo 24, 2021.
Raya hay sandig sa ginpaguwa nga abiso it opisina ni Kalibo Mayor Emerson Lachica.
May kaangtanan kara, uman nga ginpadumdom it LGU Kalibo sa mga Kalibonhons do mga ginapatuman nga protocols base sa IATF Omnibus guidelines of community quarantine in the Philippines ag do nagapatuman nga liquor ban sa bilog nga probinsya it Aklan.
Nasayuran nga kada dag-on sa pagselebrar it kapiyestahan ni San Juan hay nagapatigayon it nagkasari-sari nga aktibidad do LGU kaibahan eon kara do food festival, pahampang sa mga inunga ag do karera it baroto sa dagat apang makarun nga dag-on hay ginpaiway raya bangud sa COVID-19 pandemic. // SHERRY ANNE REUNIR-VIDAL