DAKO ang kalipay sa kaigsuonang Blaan sa General Santos City sa gideklarang special non working day sa Hulyo 22 ang ikapito nga Blaan Day sa syudad.
Human nigawas ang kopya sa deklarasyon gikan sa Malacañang nga pirmado ni Executive Secretary Salvador Medialdia nga ang Hulyo 22, 2021 adlaw nga Huwebes usa ka special non working day tungod sa Indigenous Peoples Blaan Day, daku ang kalipay sa tribong Blaan.
Sumala sa anak sa kanhi Indigenous Peoples Mandatory Representative kon IPMR nga si Faith Talon nalipay kayo sila kay gipadayon sa gobyerno ang pagdeklara nga Holiday ang ilang okasyon ug dili lang sila ang nalipay kondili lakip ang non IPs.
Bisan kon dili na daw sila makatapok atol Blaan day nasabtan daw nila ang sitwasyon sa pandemya mosunod nalang daw sila sa online platforms.
Sumala usab kay Barangay Mabuhay Tribal Cheiftain Dan Alim nagapasalamat sila sa gobyerno ilawom kay Pangulong Rodrigo Duterte nga bisan sa Pandemya gitagad gihapon ang ilang adlaw pag-ila sa ilang adlaw sa tribu, gihatagan sila og katungod nga magsaulog.
Samtang sa karon palang nagapangayo na og dispensa si Kagawad Lucio Cawayan sa iyang ka tribu kay dili tanan ang tugotan nga makatambong sa ilang kasaulogan sa ikapito nga Blaan Day gumikan sa pandemya.
Sumala kay Cawayan sa Hulyo 22 takda usab nga i-turnover ang ilang Kasfala Hall nga nahuman na kaniadtong bulan sa Mayo, limitado lang ang makatambong, samtang ang ubang mga aktibidad ipahigayon nalang sa mga barangay. ( Ever Diazon)