Patay ang 24-anyos nga lalaki matapos nga na-suffocate sa idalum sang bubon nga iya ginatinluan takna alas-8:40 Huwebes sang aga sa Barangay Apero, Tapaz, Capiz.
Ginkilala ang napatay kay Paul Galagate, residente sang Sitio Arisgal, Barangay Cristina samtang padayon naman nga ginabulong ang iya kaupod nga si Rolly Garbosa, 54-anyos, residente naman sang Barangay Candelaria sa amo nga banwa.
Sandig sa inisyal nga imbestigasyon sang Tapaz Municipal Police Station, ginapahayag nga nagpanaog si Galagate sa bubon nga ginapanag-iyahan ni Roel Garbosa para tinluan kag kuhaon ang lutak apang hinali lang ini nga nadulaan sang alinto.
Nagpanaog man si Garbosa para salbaron ang biktima apang siya man mismo pag-abot sa idalum nadulaan man sang alinto.
Gilayon nga nagpanawag sang tabang ang tag-iya sang bubon sa mga pumuluyo sa palibot kag lunsay ginpadangat ang duha sa Tapaz District Hospital.
Gindeklarar nga dead on arrival si Paul samtang si Rolly ang ang padayon pa nga gina-obserbahan.
Sa karon, natalana nga igapaidalum sa post mortem examination si Galagate para mahibaluan ang gintunaan sang ginkamatay sini. | KMD Gicalde