WALA nay Covid-19 patient nga admitted karon sulod sa Dr. Jorge P. Royeca Hospital sa GenSan. Matud ni Dr. Ryan Aplicador, Chief of Hospital sa DJPRH kini dungan sa pagkanaog sa Covid-19 cases sa siyudad. Ang DJPRH ang usa sa pito ka Covid-19 referral hospital nga nag-house og mga pasyente dihang nakasinati og ‘surge’ sa virus ang dakbayan.
Migahan ang nag-inusarang pampublikong ospital sa GenSan og 36 ka bed alang sa Covid-19 patients atol sa pagsaka sa kaso sa impeksyon. Tungod sa pagkanaog sa kaso sa virus, abli na ang pipila sa pasilidad sa tambalanan alang sa non-COVID patients.
Una nang, gibutyag ni Dr. Sulpicio Henry Legaspi, DOH-12 assistant director atol sa presscon nakalabay’ng semana usa sa nakita nilang pag-ubos sa kaso sa impeksyon mao ang nagkataas nga vaccination coverage o pagdaghan sa nagpabakuna batok virus.
Desyembre 06, gikataho sa LGU nga naa sa 39. 37% sa target population sa GenSan ang fully vaccinated. Base sa COVID-19 tracker DOH-12, ang GenSan ang dunay 63 active cases samtang 13,601 recoveries gikan sa 14,224 kinatibuk-ang Covid-19 cases. l Richel Gubalani