Padayon gihapon nga gisuta saBureau of Fire Protection –Davao ang hinungdan sa sunog nga miulbo sa iladong Department Store nga nahimutang sa Uyanguren ning dakbayan sa Davao sa milabay’ng adlaw.
Kahinumdoman nga miulbo ang kalayo pasado alas-9 sa gabii, Oktubre 5 tuig kasamtangan mismo sulod sa NCCC Uyanguren, R.Magsaysay Avenue, ning syudad.
Saysay pa sa Security Guard nga duty adtong tungora nga nailang si Arnel Manluyang, Maintenance Supervisor Frederick Rafael ug Area Supervisor Anielyn Sucobos, ilang nabantayan nga naggikan ang aso sa Freezer sa Fresh Area Department diin nagsugod sab ang kalayo.
Paspas nga miresponde ang Central 911, Central Fire Station sa BFP XI, 911 Fire Auxiliary, Davao Volunteer Fire Brigade ug Filipino Chinese Firefighter.
Gideklarang fireout ang sunog alas-10:17 sa gabii.
Padayon pang ginasuta ni Central Fire Station of BFP XI Fire Investigator FO2 Rafael Joshua A. Neri ang kantidad sa nahimong damyos sa sunog.