NAKAMUGNA og damyos ang kusog nga pag-ulan ug pagbaha sa pipila ka dapit sa General Santos City, April 3 sa kaadlawon.
Sa impormasyon gikan kay kapitan Yolando Acharon duha ka balay ug tulo ka Bangka nga walay makina ang naanod sa riverside nga sakop sa Barangay West.
Ang usa ka balay walay tawo nga nagpuyo samtang ang usa nay nagarenta nga ulitawo luwas usab kini kay sayo nga nakabalhin bag-o pa ang baha.
Sumala kay kapitan Acharon nga nausab ang agianan sa tubig baha mao nga naigo ang duha ka balay, samtang nag kumpyansa daw ang tag-iya sa mga bangka kay ilaha kini ginabutang sa lawom sa tulay sa Silway apan naabot sa tubig baha ug naanod.
Pasalamat nalang kini kay walay tawo nga naanod sa pagbaha.
Sa karon naka-monitor ang taga Barangay West sa pag-ulan gumikan kusog pa ang tubig sa sapa sa Silway.
Samtang sa Barangay Conel may damyos usab sa ilang outerlane sa dalan duol sa tulay sa Guadalupe gumikan nakankan sa tubig ang yuta ug nahulog ang semento, samtang adunay mga kahoy nga nahirig sa dalan, gilayon usab kini nga gihawanan sa ilang response team.
Sumala kay Kagawad Sandy Acunia, tulo ka tulay ang nabarhan sa mga kahoy gikan sa ibabaw mao nga niawas ang tubig sa ilang sapa,niadto sa mga pananum ug sa kabalayan.
Usa ka pamilya ang ilang gi-rescue gabei sa adlaw nga Sabado ug nakabalik na sa ilang balay pasalamat lang kini nga walay tawo nga naanod sa tubig baha.
Sumala usab sa tagbalay nga si Verturdes Pugosa, 48-anyos nga naagihan sila og taman dughan nga tubig baha mao nga naanod ang uban sa ilang kagamitan, naanod ilang mga hito, may manok ug nabasa ang sulod sa ilang panimalay.
Ang ilang hangyo nga unta wala gihimong box type ang ilawom sa tulay aron dili magbara kon may baha. I Ver Diazon