GITUTUKAN sa kapulisan sa Polomolok ang mga person of interest nga posibleng nagpaluyo sa pagpusil-angol kay Rhyolite Balili ang usa sa mga Executive staff sa ni Polomolok Mayor Bernie Palencia.
Kini ang gibutyag ni PLt.Col Joseph Forro III ang hepe sa Polomolok Municipal Police Station human sa gihimong Case Conference ug pagkuha og dugang mga ebidensya nga posibleng gamiton batok sa mga suspek aron hugtanong nang makapasaka og kaso.
Dugang pa ni Forro nga sa karon gisugdan na ang paghimo sa mga dokumentasyon ug kung ugaling sakto na ang mga gitigom nga ebidensya mas mapakusog pa niini ang pagduot sa mga nagpaluyo sa maong krimen.
Sumala pa ni Forro nga nahimong dakong tabang ang mga CCTV footages nga nakuha atol sa pagpamusil aron nga hugtanong mailhan ang mga person of interest kalabot sa insidente. Gibutyag usab ni Forro nga una nang nagpagawas og pahayag ang acting Provincial Director sa South Cotabato nga si PCol. Cydric Earl Tamayo ang nga politika ang posibleng hinungdan sa nahitabong krimen.
Wala na usab gipagawas sa nasampit nga opsiyal ang dugang pang detalye kalabot niini tungod sa nagpadayong imbestigasyon. Kahinumdumang gipusil si Balili samtang sakay sa iyang sakyanan pasulod sa Municipal Plaza sa Polomolok ug kasamtangang nagpaalim sa mga nahiagom nga samad pinusilan. I MJ Fernandez