BICOL – SA ibong kan mga restriksyon na dara kan pandemya, padagos pa man giraray an rehiyon sa pag suplay nin mga gulay asin iba pang agricultural products sa Metro Manila.
Segun sa Department of Agriculture-Bicol, sa bilog na bulan nin Hulyo, padagos an farmers cooperative/associations asin mga private traders gikan sa rehiyon sa pamamakal asin pagpapabakal kan saindang mga produkto sa mga darakulang merkado sa Maynila.
Base sa report kan Agribusiness and Marketing Assistance Division (AMAD) kan D.A-Bicol,pigkakarkolong maabot sa haros 201,000 kilos nin maniba ibang mga prutas asin lampas 22,600 kilos nin mga gulay gikan sa Camarines Sur asin Camarines Norte an naibagsak sa Balintawak, Divisoria, Pasig, Quezon City asin Kadiwa outlet sa Cainta Rizal.
Segun ki Adelina Losa, Bicol AMAD chief, apwera sa pananao nin mga banhi, planting material siring man iba iba pang production inputs asin technical assistance nagtataong asistensya man an D.A-Bicol sa mga farmers cooperatives associations sa rehiyon pag abot sa market matching, loan application asin pagbakal nin mga makinarya, ekipahe asin iba pang post-harvest facilities.
Sa katunayan, sa kasagsagan soboot kan pandemya kan nakalihis na taon, nagkapirang mga asosasyon asin kooperatiba sa rehiyon an naresibe an saindang financial grants sa irarom kan Kadiwa ni Ani at Kita program.
Naglalaom man an opisyal na sa paagi kan mga ini mas urog pang mapapausawag an saindang pagtatanom pasiring sa food security asin sa liwat na pagbabalik kan baskog kan sektor nin agrikultura dawa pa ngani igwang pandemya.